القرار الرئاسى رقم 11

اللى مركز فى اليوم ده من البداية .. كان لازم يتوقع الحركة دى من الإخوان خصوصا بعد هزيمة الإخوان شر هزيمة فى الإنتخابات التشريعية فى ليبيا ... و هو ما كسر خطتهم للهيمنة على الشمال العربى الافريقى ... فكان لازم تحرك يعيد للجماعة سطوتها أمام الرأى العام العالمى و كان الدور على مرسى بهذا القرار،

للاسف من يعتقد أن مرسى إنفصل عن الإخوان واهم جدا ... لا تجعلوا الإعلام الفضائى و الإخوانى يأخذكم بعيد عن الحقيقة التى تعايشنا معها كثيرا طوال سنة و نصف و لمسنا هذه الحقيقة من خلال مبداء   "مشاركة لا مغالبة" الإخوان مازلوا ينفذون حرفيا خطتهم للسيطرة و الهيمنة على الدولة  منذ بداية الثورة ، و دخلت جبهات الإخوان تتصارع مع كل من يفكر فى الوقوف أمام تنفيذ خطتهم من شباب الثورة (أيام مجلس الوزراء - إعتصام البرلمان) ، و كذلك العسكر و الفاشية العسكرية لا تختلف كثيرا عن الفاشية الإخوانية .. كلاهما يرى مصر فريسة يجب السيطرة عليها ، فالعسكر بعد الإعلان الدستورى الاول فى مارس ، و هو ما لم يستفتى الشعب المصرى على كل مواد الإعلان ، و تم وضع مواد آخرى تخدم العسكر فى السيطرة على البلاد ..

 المثير للسخرية أن الإخوان ساندوا العسكر فى هذا الإتجاة حتى إختلفت المصالح فخرجوا علينا و قالوا أن الإعلان الدستورى باطل ... ما حدث اليوم من عودة البرلمان آراه قرار إخوانى بحت و خرج من داخل الجماعة و كبار مستشارين الجماعة فى القانون ظلوا يدرسوا القرار طيلة إسبوع بغية أن يكون أول قرار قوى و مصيرى يتخذه الرئيس محمد مرسى (الإخوانى) و يكون بمثابة صفعة قوية للعسكر للرد على سيطرة العسكر على الجماعة طيلة العام و النصف المنصرم ...

ياسادة نحن فى المقصلة بين ذراع الإخوان الان و هو الرئيس ، و ذراع العسكر و هو الإعلان الدستورى الأول و المكمل ، الجماعة ستقاتل و تقاتل من أجل الجماعة فقط .. و العسكر سيقاتل و يقاتل من أجل الا يخرج من المولد بلا حمص ... دعونا نشاهد هذه المسرحية الدستورية المصرية الخالصة و التى لن تجدوها سوى فى مصر ،

الإخوة فى ليبيا ايقنوا اللعبة باكرا و أخرجوا الإخوان من اللعبة التشريعية فى ليبيا ... و نحن فى مصر دعمنا الإخوان فى إنتخابات الرئاسة (معلومة انا من المبطلون) بدعوا انهم تعلموا الدرس و سيحققون مبداء مشاركة لا مغالبة .. و توهمنا أن الإخوان سيأتون بالدكتور البرادعى رئيس لوزراء مصر .. و رسمنا الخيال الذى نسجه لنا الإخوان كى نسبح فيه و لا نرى ما يخطط له الإخوان و هو دعوهم يتوهمون و دعونا نعمل على الخطة الموضوعة ، الهدف كان أن يعيش الشعب المصرى بكل أطيافة فى إحلم و توقع من رئيس وزراء مصر القادم ،  حتى تصل إلى درجة الملل و تقبل بإى شخص و السلام مع ظهور حملات إخوانية منظمة و إشترك بها التيار السلفى للترويج للمهندس خيرت الشاطر رئيسا لمصر مدعومة بدرجات علمية يحملها الشاطر ، و كأن مصر لا يوجد بها أشخاص أخريين يحملون درجات علمية أعلى من الشاطر ، و على رأسهم البرادعى نفسه .. لكن التوقيت عند الإخوان هام جدا فهم يعلمون هدفهم الى أين، لذلك دعونا لا نعيش بالعاطفة أصداء القرار الرئاسى رقم 11 ، و دعونا ننتظر و نشاهد قتال الفاشية الإخواني ضد الفاشية العسكرية.

البنزين و العدالة الاجتماعية

البنزين و العدالة الاجتماعية

اليوم الاول من شهر يونيو، تحققت أن الثورة حققت واحد من أهدافها و من مبادئ الثورة و هو العدالة الاجتماعية ، النهاردة و انا راكب التاكسى و بنتحرك فى شوارع مصر ، عرفت معنى العدالة الاجتماعية ، النهاردة شوفت المرسيدس و البى إم و الشيروكى ، واقفين فى الطابور جنب ال 127 و 128 و السيات و باقى العربيات الشعبية الأصيلة و المتهالكة ، صحيح دى ناس هتمون 92 و 95 و دى ناس هتمون يا 80 يا 90 بس مش مهم أهو فى النهاية الكل سواسيه قدام طلمبة البنزين.

انت تشوف الطابور الطويل اللى ممتد فى الشارع و كله واقف فى إنتظام مستنى دوره ، تعرف على طول ان مصر إتغيرت ، و الثورة و صلت للبنزين على الاقل ، فين أيام زمان لما كان الواحد من دول يدخل و يقولك متعرفش انا ابن مين فى مصر ، و يمون قبلك ، النهارده الموضوع اتعكس الواحد من دول يدخل قدام الطلمبة و يتحايل على العامل الغلبان اللى شغال باليومية علشان يفول التانك و العامل يقوله بكل حزم و صرامة ، انا أسف يا فندم بس هما 20 لتر بس ده الحد المسموح ، و يفضل الباشا يتكلم و يبرطم و العامل يقولوه حضرتك ممكن تروح بنزينة تانية و تمون كمان 20 لتر ، و الراجل ينفخ و يقوله خلاص خلصنى ، و يزود كمان ده ايه البلد دى ، أدى اللى خدناه من الثورة ، و هنا يبان لك ان الثورة قدرت تساوى بين الطبقات المختلفة فى مصر بنسبة 90% تقريبا، و سبحان الله فى نفس الطابور تلاقى واحد تانى راكب عربية شعبية أصيلة متهالكة تماما و يزعق بصوت عالى طبعا علشان سيادة الفريق أو الاخوان لما يجوا يحلوا المشكلة و نعيش فى تبات و نبات ، منهم لله كله بيتاجر بالشعب ، حسبى الله و نعم الوكيل ، ترد عليه واحدة من سيدات المجتمع الراقى (مزه يعنى ) و هى مش طايقه نفسها لمجرد انها مش عارفة تفضل مدوره العربية علشان الاير كونديشن ، و اضطرت تبطل العربية علشان قله البنزين و تقوله ، مش انتو اللى انتخبتوا الاشكال دى ، ماهو احنا صوتنا اتبح و قاعدنا نقول انتخبوا حمدين ، بس انتوا لبستونا فى شويه تيييييت (كلمه صعب تقولها غير واحده مزه و معناها أكياس الجوافة دول ) يلتفت الجميع الى المزه و ينظرون لها نظرة إستغراب ، و هنا يتبين لنا ان الثورة وصلت الى بعض الرأسمالين المصرين أيضا و تعلقوا  بها ، مثل الطبقات الوسطى ، يطلع بقى راجل فى العقد الخامس تقريبا كده و يقولك أدى ياعم جيل الفيس بووك و التويتر النسوان خلاص عيارها فلت ، عالم معندهاش دم ، و بعدين فجأة يرد علينا واحد ملتحى فى سيارته مع زوجته و يقول و الله الشريعة هى الحل و هى اللى هتلم الاشكال دى من الشوارع و تنضف البلد ، بكره يشتاقوا للايام دى ، أستغفر الله العظيم ، يقوم واحد تانى يقوله مش هتنلوها ياشيخ ، و الفريق هيكسب و ترجعوا تانى لامؤخذه الجحور ، هنا بقى تظهر المزه تانى و تقوله لا مش هيكسب و مصر مش بتاعت أهليكم و لا ورث علشان تغيروها إحنا خلاص مبقناش بنخاف، قال يتلموا قال ،و تقوم مولعه السيجارة و يعم الصمت على الجميع.


 الغريبة انى  لم أشترك فى اى من هذا الحوارات الصراحة يمكن لانى معنديش عربية و مش فارق معايا البنزين ، بس انا كنت مستمتع بمنظر العدالة الاجتماعية فى محطة البنزين و قلت فى نفسى مين قال إن الثورة خلاص بح ، لا ابدا الثورة مستمرة لحد ما نوصل للعدالة الاجتماعية فى طابور العيش.

المهم بقى فى الموضوع ده إن سواق التاكسى اللى انا فيه قرر يتحرك و يترك الطابور وقالى يا عم يالله بينا نمشى دى مش باين لها إن إحنا هنمون، قولت له و هنمشى إزاى من غير بنزين ، قالى لا ما اهو انا بشتغل غاز برضوه ، سئلته طيب و كنت عايز تمون بنزين ليه؟! ، قالى علشان أمن نفسى يا هندسة ، قولت له هو الغاز مفيهوش أزمة ، قالى لا مش قوى أصل الغاز ده بتاع الغلابه ، و هكذا توالت الطوابير على محطات البنزين فى شوارع مصر ، و تحققت العدالة الاجتماعية بين البى إم و السيات الشعبى!!!


أعز الله مصر ..و شعب مصر!!


محمد على 

إهانة الذات العسكرية

قام البرلمان و لم يهداء ضد النائب زياد العليمى و اتهموه بإهانة الذات العسكرية للمشير ، و تم توجية التهم له ، و طالب النواب وقتها بفصله من البرلمان لانه أهان الذات العسكرية و الوطنية لرمز مصرى و هو المشير طنطاوى ،  و لم يسمع احد صوتا لهم عندما أهان النائب البرلمانى ممدوح إسماعيل (نائب الاذان) الشعب المصرى امس على الهواء و قال عنهم "ده شعب قليل الادب و مترباش وبيحشش " ، واحد هيقولى النائب البرلمانى ممدوح إسماعيل عضو الجماعة الاسلامية، قد تهجم على سيدة متصلة بالبرنامج ، و لكنه هجم عليها و لم يعطها الفرصة للكلام و استند الى منهج التخوين وهو المنهج الدائم و الاسهل فى الاتباع، المهم اننا لم نسمع صوتا لاى من نواب البرلمان بكامل طوائفهم ، خصوصا من التيارات الاسلامية التى وقفت بالمرصاد للنائب زياد العليمى ، و ساندوا النائب مصطفى بكرى ضد طلب تحويلة لهيئة البرلمان نتيجة سبه الدكتور محمد البرادعى الذى يعتبر ايضا رمزا من رموز مصر على الاقل رمز علمى لمصر.

كنت منتظر اليوم مع إستئناف جلسات البرلمان ان يتقدم أى من النواب بطلب و لو إيضاح للنائب ممدوح إسماعيل بشرح و تفسير كلامه و لكن عملا بالمثل الشعبى الشهير "أنا و اخويا على ابن عمى و انا و ابن عمى على زياد" .. سكت الجميع و ولم ينتفض احد لكرامة الشعب المصرى الذى هو اصل الرموز و أصل كل شئ و الذى من أجلة قامت الثورة لتعلى قدره و كرامته ، فليشهد التاريخ أن النواب الاسلاميين قاموا و ثاروا من أجل رمز عسكرى هو فى الحقيقة يعمل فى خدمة الشعب المصرى ، و لم يثورا البرلمان من أجل إهانة كرامة الشعب المصرى الذى إنتخابهم.

أنا فى الحقيقة لا ازايد على اى شخص او ارمى لاى شئ و لكن هذا الموقف كنت انتظر فيه إعلاء شعار الثورة (كرامة إجتماعية) ، هذا اذا كان اعضاء البرلمان يعتقدون ان إعلاء كرامة المصرى ستتحقق من خلال تحديد سن الزواج للفتاة أو ختان الفتاة و حرمته أو إلغاء قانون الخلع و إلغاء قانون التحرش و الغاء قانون الايجار القديم ، وقانون العفو السياسى على نظام مبارك البائد او سن قانون تجريم التظاهر و الاعتصامات التى ذهبت بهم الى كراسى البرلمان كأغلبية بعد ان كانوا مطاردين.

عــــــار عليكم ايها المتأسلمون ما حدث من إهانات للشعب المصرى فى ظل صمتكم  ...و لا ده كان بما لا يخالف شرع الله.!!!

فى إطار نفس الموضوع ، الشيخ جمال صابر ، مؤسس حركة لازم حازم ، قال الاسبوع الماضى على الهواء مباشرة مع الاعلامى حافظ الميرازى ، قال الشيخ مهاجم الجيش المصرى الذى هو ايضا رمز من رموز الوطنية المصرية ، هاجمه الشيخ جمال قائلا "الجيش المصرى أسدا على مصر و فى الحروب نعامة" .. كنت انتظر ان يخرج علينا الاستاذ المحامى صاحب دعوة إزدراء الاديان ضد الفنان عادل امام ، كنت انتظر ان يقوم بتقديم بلاغ ضد الشيخ للنائب العام بتهمة إهانة الذات العسكرية و التاريخ العسكرى المصرى ، أو ربما كنت انتظر احد المواطنين الشرفاء الذى قدم العشرات من البلاغات للنائب العام ضد نشطاء الثورة و اولادها بتهمة إهانة الجيش المصرى و الاعتداء على العساكر و الظباط بالالفاظ و هى التهم التى حققت فيها النيابة العامة و النيابة العسكرية بل و اصدرت فى بعض منها احكام بالحبس على نشطاء مصريين ، كنت انتظر ان يتقدم احد نواب الشعب المصرى و حبذا لو كان الاستاذ مصطفى بكرى حامى حمى المستقليين و الجيش المصرى فى البرلمان ، ان يتقدم ببلاغ للنائب العام ضد الشيخ جمال ، او ربما أحد اعضاء حزب الحرية و العدالة الذين هتفوا الاسبوع الماضى فى المحلة فى مؤتمر الدكتور محمد مرسى "الجيش و الشعب إيد واحده" و قالوا نرفض اى اهانة للجيش. لكن فى الحقيقة يبدوا لنا ان الكيل لم يعد حتى بمكيلين بل اصبح بعشرات المكيلات ، كنت اانتظر احد من أعضاء الوفد المصرى الشعبى الذى سافر الى السعودية لتقديم قربان الاعتذار و طلب السماح من آل سعود ، كنت انتظر منهم ان يتقدموا بالاعتذار للشعب المصرى عم تكبده الشعب من ذل و مهانة طوال العام و النصف المنصرف ، من اجل إعلاء كرامة الوطن.

و كله بما لا يخالف شرع الله.

مرة أخرى سأقولها كلما طالت الفترة الانتقالية .. تسقط المزيد من الاقنعة ... و رب ضارة نافعة.

محمد على 

مرشحى الرئاسة على المحور

  اليوم كان اول يوم لم يغلبنى فيه النعاس و انا راكب الباص و فى طريقى للعمل فى القرية الذكية ،  اليوم هو اول يوم لى ارى و استمتع و استطلع طريق المحور منذ إنتقلت للقرية الذكية من ستة أشهر ، و كم كان حظى سعيد إنى إستمتعت بصحبة مرشحى الرئاسة فى مصر و صورهم و بوستراتهم على جانبى الطريق، صورهم المزينة بجمل قصيرة إنما مفيدة جدا تكاد تكون درس معنوى و رسائل ينطبق عليها خير الكلام ماقل و دل ، المهم لفت نظرى لالفتات الاعلانات الملاصقة او المقابلة وربما التالية لصور و لافتات السادة المرشحين أول هذه اللافتات كانت كالاتى:

(معلش هتكلم شعبى شويه) 

هتلاحظ على الجانبين بوسترات الفريق أحمد شفيق بكترة و كانه حصار لعينك و هتلاقى على أعمدة الاعلانات او على الفواصل الخرسانية بين الاتجاهين، المهم واحدة من الصور دى و المكتوب عليها أحمد شفيق أفعال  وليس الكلام تقريبا تلاقى صورة بعديها على طول إعلان مكتوب عليه بيروسول .. أقوى مبيد حشرى فى مصر، فتحس إن إعلان بيروسول بيرد على إعلان شفيق، و بعدين تتمشى شوية مابين صور احمد شفيق و تظهر لك فجأة صورة الدكتور محمد مرسى على الجانبين و مكتوب عليها الدكتور محمد مرسى رئيسا لمصر بمشروع النهضة ، و بعديها على طول تيجى صورة إعلان محمد منير لشركة فودافون مكتوب عليها "كل المفروض مرفوض" و هو ابلغ رد على صورة الدكتور مرسى و الحمد لله إن مكتبوش بعديها إعلان كاوتشوك و الا كانت جت على الجرح. بعد كده يظهر عليك الفارس المغوار الاستاذ عمرو موسى و مجموعة متنوعة من الصور و البوسترات مرة مع الارض الزراعية مكتوب عليها لعودة كرامة الفلاح، ومرة مع العمال و مكتوب عليها من أجل نهضة العمال و الصناعة ، ومرة مع التلاميذ فى المدرسة مكتوب عليها من أجل النهضة بتعليم و لادنا، و كلهم مكتوب عليهم "إحنا أد التحدى" و يقف فيها عمرو موسى شامخ رافع رأسة لفوق مش عارف ليه، المهم بعد ما تملى عينك و تتمتع فى صورعمرو موسى  هتلاقى إعلان كبير لشركة موبنيل مكتوب عليها " إختار نظام كلامنجى" و بعدها على طول لافتة تانية مكتوب عليها "هاينز عملت مكرونة" !

و بعدين هيظهر علينا إعلان حمدين صباحى صاحب البسمة العريضة و مكتوب عليه حمدين صباحى رئيسا لمصر  2012 واحد مننا  بعديها على طول هتلاقى إعلان مكتوب عليه "مكرونة الملكة ... مصرية 100%" و ده بيوضح طبعا ان حمدين صباحى مصرى و شعبى جدا ، و بعدين صورة للاستاذ الدكتور محمد سليم العوا ، مبتسما و كاتب بالعدل تحيا مصر ، و تلاقى على طول إعلان بعده مكتوب عليه نسكافية "صحصح للدنيا" ، و بعدين يظهر الدكتور محمد أبو الفتوح  بإعلان برتقالى مكتوب عليه محمد أبو الفتوح رئيســــا لمصر 2012 ، و بعدين تلاقى إعلان فودافون و محمد منير "القوة بين إيديك" و بعدين إعلان معمل البرج مكتوب عليها "معمل البرج لكل المصريين ..إتطمن" و بعدين إعلان مكتوب عليه "هارد لك لو إنضحك عليك فى شقة .. خليك معانا ..مش عارف شركة إيه كده للاستثمار العقارى" و طبعا مع كمية البوسترات دى بيظهر احمد شفيق ما بين كل صورة و صورة صورتين للفريق ، كارت حشر يعنى، و الحمد لله غاب عن الاعلانات دى ابو العز الحريرى و عبدالله الاشعل و خالد على ، تفتكروا فى علاقة بين الصور دى و بعضيها ، يعنى انا ممكن أشتغل محلل إعلانات رئاسية ، إشمعنا الناس بتوع Body Language    يعنى هى جت عليا انا . 

محمد على 

من ملفاتى القديمة

بدور فى ملفات قديمة ... صادفت قصاقيص ورق مكتوبه بكل صدق .. فاكرت أجمعها هنا .. أصله تاريخ و ذكريات

1

قبلاتى لكى

 ميثاق و عهد 

نظراتى لكى 

كالوحة بيضاء 

تغازل فرشاتك 

ألوانك الخجولة 

أحضانى لكى 

معاهدة 

حب و سلام 

1-4-2005

لقد تقابلنا مرة واحدة ياحبيبى...لقد جئت يوما ... ياحبيبى ثم لم تخرج أبدا .. من قلبى!

رتبى .. لموتنا

 لم يجئ حبنا 

فوق إنكسار الاحزان...

و طوفان الدموع 

و حرارة الجو 

وصمت الاحجار 

فما خسرنا 

و ما كسبنا

 و قد تخطى بنا الوقات

 و لم يعد ذاك العصر عصرنا.

3-9-2005

مابين ... خديكى..وما بين .. شفتيكى..شئ قبيح ...يدعى حبك!

10-9-2005

ليس لدى من غرامك ... سوى دمعتان!

15-9-2005

كيف أضعك

 طوع أمرى 

وكل شئ

خارج السيطرة

 لم تعد لدى القدرة.

11-10-2005

إن حبى ...

لا يقدر بعمر 

لاننى أقدم النبيذ ...

لمن لا يعرفون ..

نعمة السكر! 

25-10-2005

 إنتصف الليل ورحلنا

 ذهبتى تحلمى بحبى

وذهبت أفكر

كيف ارضى

دموع على وشاحك الشتوى 

كيف أعشق نظراتك الدافئة 

فى ليالى البرد القارسه.

10-12-2005

حبى لكى ياظالمة...

لم يكن مجرد شعارات..

كذبت ام لم اكذب 

فقد وضعتك فوق الاختيارات.

14-1-2006

ياسيدة كل الاماكن...

ياسيدة كل الازمان...

أكتب لكى ..

وحدك وصيتى ...

و انا فى القمة ...

الامتنان!

15-4-2006

ولم يبق من مجد قلبى ..

سوى حلقات من دخان  ..

وصورتك وحطام قلب!

15-4-2006

 

جولة مع مرشحين الرئاسة 2012

و انت طالع كوبرى اكتوبر من مطلع صلاح سالم هتلاحظ سيطرة صور عمرو موسى على اسوار مطلع الكوبرى بلا منازع و بعد عدة امتار من المطلع تبداء فى الظهور صور الدكتور ابوالفتوح بغزارة  يتخللها صور قليلة جدا للمرشح خالد على  و تلاحظ بعض صور ابو الفتوح الذى يظهر بها الدكتور مرتديا بدله وخلفه اعلام مصر و تحت شعار ابو الفتوح رئيسا لمصر 2012 ملصوقة فوق صور خالد على الذى يظهر فى صورة الثورى الذى يهتف فى مظاهرة و تحت شعار مرشح الثورة خالد على رئيسا لمصر 2012  , و بالاستمرار فى التقدم على الكوبرى ومع انتهاء الفواصل الجانبية يظهر الفريق احمد شفيق ببوسترات معلقة على اعمدة الانارة و تلاحظ انه يستخدم صورتين فى الدعاية احدهما تشعر انه مطرب رومانسى شهير، و الاخرى يقف مرتديا بدله رسمية و يستخدم نفس الشعار "رجل الانجازات من اجل مصر للجميع" بينما   يظهر عمرو موسى علىى اعمده اخرى وله صورتان ايضا احداهما و هو يقف مرتديا بدلة رسمية و ملفوف بعلم مصر و تحت شعار "عمرو موسى رئيسا لمصر من اجل نهضة وطن" و الصورة الاخرى يظهر فيها موسى و هو يتحدث و تحمل نفس الشعار، و تظل المنافسة بين موسى و شفيق اعلى كوبرى اكتوبر و يختفى جميع المرشحين الاخرين ، ومع وصولك الى مخرج الدقى يبداء فى الظهور على استحياء صور الشيخ حازم صلاح ابواسماعيل على الرغم من انه من سكان الدقى، بعدها تظهر صور قليلة ايضا للمرشح سليم العوا ربما صورة اواثنين و تختفى مع الوصول عند شارع التحريرحيث يظهر ابو اسماعيل مرة اخرى و يستخدم ابو اسماعيل اربعة صور فى حملته الدعائية احدهم يظهر وهو ينظر مباشرة للكاميرا ويبتسم مع شعار "سنحيا كراما" و الاخرى يظهر و هو ينظر الى الارض و معه نفس الشعار ،  اخرى رافعا يده لاعلى و مكتوب عليها "ادركوا اللحظة الفارقة" و اخيرا صورة وهو يبتسم  بعيدا عن مواجهة الكاميرا و معها شعار " سنحيا كراما وطن مصون" يمكنك ملاحظة امكانية تواجد الاربع بوسترات الخاصة بابو اسماعيل جميعها معا فى نفس المكان، يسيطر ابواسماعيل على حوائط شارع التحرير بالدقى و يضع احد محلات المخابز بوستر بحجم كبير للشيخ ابو اسماعيل ، بعد تقاطع كوبرى الدقى وفى الاتجاه الى شارع التحرير ايضا يظهر بقوة عمرو موسى على الحائط و تضع شركة تامين بوستر لعمرو موسى بنصف طول المبنى تعلن فيها الشركة عن دعمها لعمرو موسى ، يتخلل هذه الدعاية بعض الجرافيتى الخاص بالشيخ ابواسماعيل على جدران احدى المدارس بشارع التحرير ، مع دخولك شارع محى الدين ابو العز ستجد صورة واحدة للمرشح الدكتور عبد الله الاشعل مكتوب عليها الاشعل رئيسا لمصر 2012 ، ثم يظهر مرة اخرى عمرو موسى و يزاحمه ايضا ابو اسماعيل وثلاث او اربع بوسترات لبثينة كامل مكتوب عليها "من اجل عصر جديد" ، حتى سور نادى الصيد ستلاحظ اختفاء صور المرشحين و ظهور جرافتى التراس الاهلى و عبارات القصاص و جرافتى كاذبون ، وصورة وحيدة لا ابو اسماعيل تم تشويه الصورة باستخدام الالوان السوداء ، من ثم ستخرج الى شارع جامعة الدول العربية ليظهر لك عمرو موسى بقوة و سيطرة تغطى على حملة ابو اسماعيل فى الشارع و حتى مسجد مصطفى محمود ،سيظهر ابو اسماعيل بقوه مره اخرى و يختفى مع نهاية شارع مسجد مصطفى محمود.

الملاحظ هنا ان حملة ابو اسماعيل تسيطر على 60% من تاكسيات الاجرة و بعض السيارات الملاكى بينما يظهر ابوالفتوح على السيارات بإستحياء من فترة لاخرى .

ايضا يجب على حملة الشيخ ابو اسماعيل اقتحام كوبرى 6 اكتوبر حيث لايوجد اى تواجد لا ابواسماعيل اعلى الكوبرى و هوما يعد معجزة بكافة المقايس ، والله الموفق والمستعان!!!

https://www.facebook.com/notes/mohamed-ali/%D8%A7%D9%86%D8%A7-%D9%88-%D9%85%D8%B1%D8%B4%D8%AD%D9%8A%D9%86-%D8%A7%D9%84%D8%B1%D8%A6%D8%A7%D8%B3%D8%A9-2012/10151432952425627

الكابتن أحمد شوبير ... أبودومه!

إكتب يا أبنى : " أمرت النيابة بحبس المتهم أحمد أبو دومة 30 يوم على زمة التحقيق فى احداث شارع مجلس الوزراء و مجلس الشعب " 

هذه ربما تكون أخر جملة كتبت فى محضر تحقيق النيابة مع احمد ابو دومة ... 30 يوم ... لماذا 30 يوم ، طبعا انا مش محامى ، بس الفكرة ببساطة هو تقريبا كده حرمان ابو دومة من الكوبونات اللى هتتوزع على الناس فى الاحتفال العسكرى المزعوم بالذكرى الاولى لعيد ثورة 25 يناير المجيدة ، فكان لازم أحمد يتم إستبعاده من هذا الحدث الجليل ، و الاهم من ده طبعا تلميعه إعلاميا بشوية مصطلحات من عينة ده عميل و بيتمول من بره ، و كمان  هو اللى حرق المجمع العلمى و ده عيل من بتوع 6 ابريل من اللى خربوا البلد و ماثونى و مش بعيد ملحد و الكلام الاعلامى ده. 

ربما يكون اخطأ احمد ابو دومة فى اللقاء الذى قدمه مع الاعلامى وائل الابراشى عندما قال انه كان يلقى بالملوتوف على المبنى المقدس فى الشارع المقدس ، و هو ما اخذ عليه كإعتراف و دليل إدانه و بلاغ للنائب العام و بسرعة لقى نفسه فى النيابة متهم ، طيب يا سادة بفرض إن ابو دومة إرتكب هذا الفعل، كم عدد البلاغات التى قدمت فى ابو دومة للنائب العام ، ما شاء الله ناس كتير بتحب البلد قدمت بلاغات للنائب العام ، كل الناس دى بتحب مصر و قلبها عليها و عايزين يقضوا على المخطط الصهيونى الماثونى الاجنبى الدولى العالمى للقضاء على البلد و عايزين  يكشفوا الخونة ، و شال ابو دومة  الليله ،شوف إزاى ، المصيبة إن نفس الناس دى شافت و سمعت المؤتمر الصحفى للوزيرة الابدية فايزة ابو النجا ، و سمعوا اسماء كل الجمعيات اللى قالت ابو النجا عتها انها مموله من الخارج  و لم يكن فيها اسماء شباب 6 إبريل ، بس معلش هما بردوه خونة و ممولين من الخارج ، و سبحان الله نفس الناس دى من حوالى خمس شهور مضت سمعوا و شاهدوا على التلفزيون إعتراف الكابتن أحمد شوبير بتزوير الانتخابات بنفسه فى دائرة طنطا و لم يتحرك منهم أى شخص ببلاغ واحد للنائب العام ضد شوبير و إتهامه بتزوير الانتخابات ، مع إن ده أحمد شوبير ( عضو بالحزب الوطنى المنحل - أمين عام لجنة الرياضة بالحزب المنحل - أمين عام لجنة الرياضة للبرلمان المصرى من 2005 و حتى 2009 ) واحد من الناس اللى كان بيهلل للاستاذ جمال مخلوع أو علاء مخلوع أو المخلوع نفسه - مش مهم - المهم إن شوبير مواطن شريف و إعلامى ناجح و كابتن مصر السابق ومن جيل كاس العالم ( إحدى إنجازات المخلوع) مش كده يا بشر ، و الاخر أحمد أبو دومة شاب مصرى حمل على كتفه هموم تطهير البلد و ساند ابو دومة العديد من المظلومين منذ 2005 و حتى الان ( تقريبا نفس مدة خدمة الفل شوبير للبرلمان المنحل) بس ابو دومة مرحش كاس العالم ، و ابو دومة مش كابتن مصر ، و ماكانش بيهلل للمخلوع و عائلته ، مش كده.

انا لست هنا للدفاع عن ابو دومة ، و انا لا اعرفه شخصيا و لكن انا اتكلم عن مواقف متشابه فى عصرنا هذا ، اخذت الموجة الشعبية تخون شاب مصرى فى مقتبل العمر بينما تخطت عن خطايا الفل الكبير ، لمجرد إن ابو دومة خرب البلد ، و وقف عجلة الانتاج و هو السبب فى حرق كتاب وصف مصر و المجمع العلمى ، و هو السبب فى كارثة شارع مجلس الوزراء ، و من هذا المنطلق اطالب انا بالتحقيق مع شوبير فى إعترافه بتهمة تزوير الانتخابات ، و التى إعترف بيها على الهواء مباشرة فى لقائه مع مجدى الجلاد فى برنامج انا و ضميرى فى رمضان الماضى ، و لا هى المشكلة إن ابو دومة ظهر مع الابراشى و شوبير ظهر مع الجلاد ، و لا هو المنطق إن المزور يصبح حر طليق و الشاب يتحبس 30 يوم ، 

ملحوظة : الشخص الذى قدم البلاغات فى احداث مجلس الوزراء يتهم فيها كل من ابو دومة و نواره نجم و علاء الاسوانى و  الاخرين هو على فكرة من طنطا !!!!  و المصيبة مش إنه بس مش ساكن فى القاهرة لا ده كمان من نفس الدائرة التى إعترف شوبير بتزوير الانتخابات فيها ... بس نعمل ايه بقى العتب على النظر!!! 

أخيرا ، اتمنى من الله ز و جل فك أسر كل مظلوم ، و سوف ينصر الله الحق و سيزهق الباطل اينما ذهب أو طال به الامد فالحق حق!

ملحوظة أخيرة : سانشر الان اللينك الخاص بلقاء ابو دومة مع الابراشى و اللينك الخاص بلقاء شوبير مع الجلاد ، و الله الموفق 

اللينك الخاص بأبو دومة 

http://www.youtube.com/watch?v=gFIFlYK3QzE&feature=share&fb_source=message 

اللينك الخاص بشوبير 

http://www.youtube.com/watch?v=0spD9LgPxEI&feature=share&fb_source=message 

محمد على